(រីយ៉ាដ)៖ ខ្សែការពារសញ្ជាតតួកគី Merih Demiral បានចូលរួមជាមួយក្លិបអារ៉ាប៊ីសាអូឌីត Al-Ahli ផ្ទេរមកពីក្លិបអ៊ីតាលី Atalanta លើកិច្ចព្រមព្រៀងរយៈពេល៣ឆ្នាំ។ នេះបើតាមការប្រកាស ពីក្លិបលេងនៅលីគកំពូលអារ៉ាប៊ីសាអូឌីត Saudi Pro League ហើយត្រូវបានចុះផ្សាយដោយសារព័ត៌មាន CNA នៅថ្ងៃទី២០ ខែសីហា ឆ្នាំ២០២៣។

ក្លិបទាំងពីរ មិនបានបង្ហាញពីតម្លៃ នៃការផ្ទេរកីឡាករវ័យ ២៥ឆ្នាំនេះនោះទេ ប៉ុន្តែប្រព័ន្ធផ្សព្វផ្សាយអ៊ីតាលី បានចុះផ្សាយថា កិច្ចព្រមព្រៀងនេះ មានតម្លៃ២០លានអឺរ៉ូ (២១.៧៣លានដុល្លារ)។

​Demiral ដែលបានចូលរួមជាមួយក្លិប Atalanta ដោយផ្លាស់មកពីក្លិប Juventus ក្នុងឆ្នាំ២០២២នោះ រកបានគ្រាប់បាល់ ១គ្រាប់ ក្នុង ២៨ប្រកួត ក្នុងការប្រកួតទាំងអស់ សម្រាប់ក្លិប Atalanta កាលពីរដូវកាលមុន។

Demiral ជាកីឡាករថ្មីចុងក្រោយ ដែលបានចូលរួមជាមួយក្លិប Al-Ahli បន្ទាប់ពីការទៅដល់របស់កីឡាករ Riyad Mahrez, Roberto Firmino, អ្នកចាំទី Edouard Mendy, Alain Saint-Maximin, Franck Kessie និងកីឡាករ Roger Ibanez។

សូមជម្រាបថា ក្លិប AI-Ahli ទើបតែឡើងទៅលេងនៅលីគ Pro league វិញ បន្ទាប់ពី១រដូវកាល លេងនៅលីគលំដាប់ទី២៕